Mat 20 | WSK | STEP | Jesus ko olekem alo nunga maonam, “Duruk wonong ko kingdom mu iwita: Tom bo kari bo tumong biyala kaparam ale kari sang ko waen ningam ningi ura ilumonko nunga maonam.

Matthew 20

Waen ningam ko ura kari ura koma taman wore nunga den ira

1 Jesus ko olekem alo nunga maonam, “Duruk wonong ko kingdom mu iwita: Tom bo kari bo tumong biyala kaparam ale kari sang ko waen ningam ningi ura ilumonko nunga maonam. 2 Nu worem suwanta te silver biling suwanta te nunga diarukko nunga maonam, ale arungu den nungam. Asele ko waen ningam ningi ura tamonko balam se nama gilingiman. 3 Se udagi 9 o'clock te, nu wonong kusumuri namaram ale kari sikina ura mena, am animan, mu nungarkam. 4 Ale nunga maonam, ‘Nina karogo namaral aninga waen ningam ningi ura tal, se ani koma diram te ninga diarikko.’ 5 Se nuna nama gilingiman.

“Se udagi 12 o'clock, se 3 o'clock te ningam kotam aking namaram ale butata la beteram. 6 Se bainga ningi, 5 o'clock iwita, nu akingtala namaram ale kari sikina am ipi sanamingaman mu nungarkam. Ale nunga maonam, ‘Nina awuk se ewerete ura mena yam ipi sanamiwasan se worem nama kapurukko kam pingi aram a?’ mam. 7 Se nuna nu manorman, ‘Ana kari bo ura me nangaram se,’ maman. Se nu nunga maonam, ‘Se nina karogo am namaral aninga waen ningam ningi ura talko,’ mam.

8 “Se sor baingam se ningam kotam ko ura bitua kari maonam, ‘Ura kari nunga aru se taimon se ni manga nungaruko. Ni ura kari udagi taiman mu te duap bitar, nama ura kari giriman taiman mu te nungaru kutuwurko.’

9 “Se ura kari alo bainga ningi 5 o'clock ura duap beteman mu nuna giriman taiman, ale manga silver biling suwan suwan taman. 10 Tom ura kari giriman ura duap beteman mu aratu gilingiman, mu nuna ikiman manga silver biling suen biya tamonko i maman. Bare mena. Nuna betela manga silver biling suwan suwan tala to gilingiman. 11 Taman ale ningam kotam ko nongomang magaram se 12 iwita nu manorman, ‘Ura kari bainga ningi taiman mu hour suwanta ko ura to gilingiman, se ni manga nungarem mu ana taman iwitatala ni nungarem. Bare ana worem ningi ura aora garagar taman ale worem ninguru kaniman!’

13 “Nuna iwitata balman, se ningam kotam mu nunga ningi bo iwita maonam, ‘Aga bo, ani me ka bita maguwusam. Analak maingkala ni manga silver biling suwanta toko mu ko den nungurman. 14 Se nika manga silver biling to ale namarko. Aninga angamang manga silver biling ni kisem turantala kari udagi nunguningkiri tairam mu tuekko, se butata tuem. 15 Se ani agata aga manga te mel bo bitirikko mu me terong mauk i? Bare ani munan yawara kari sang nungumik te beterem owore ko ni gemang ikuwuram e?’”

16 Jesus ningam kotam se ko ura kari alo nunga den ira imitang balam, asele ko olekem nunga maonam, “Butatala, kari udagi namawasan mu girimonko, se kari gira namawasan mu udagi pelemonko.”

Jesus akingtala balam nu kueruk ale barasukko ma balam

(Mark 10:32-34; Luke 18:31-33)

17 Se Jesus Jerusalem namawa se ko olekem 12 nunga giam arungu tagi tam ale nunga maonam, 18 “Ikialko,” mam, “ana Jerusalem namasan. Se mu te kari sang Kari ko Kuriang priest bibiya se Law Den ko kausa kari bibiya nuguting te betemonko. Se nuna isa tumon ale balmon, ‘Am kuerukko,’ mamon, 19 ale sor saki ko kari Juda mena wore nuguting te aking betemonko. Se gusira den manarmon, lilumomon, ale tam kangono te tagimon se kuerukko. Bare nama tom ilagala suwan mu te nu aking barasukkowo.”

James John nunga nunam kari bibiya bagomonko Jesus isuam

(Mark 10:35-45)

20 Se tom mu te Zebedee ko kuriang ilagala nunga nunam ilak nuna Jesus kote taiman. Se nunam Jesus koma dugu te bugura kulukuam ale iwita maonam, “Ni mel ani ko balik mu am agiring ilup i?” mam.

21 Se Jesus nu isuam, “Anape mel ko kuesam a?”

Se nu balam, “Tom ni King Biya ko aratu mu te ni balu se aninga kuriang ilagala mu bo nika kiting sengam mu te daigok, se bo nika kiting ngas mu te daigokko.”

22 Buta balam se Jesus nunga maonam, “Nina mel ko aninga isarman mu ko duap ninguru me ko ikisan. Nina ikup ani giekko negawasam mu nina am gial i?” ^{▼▼Mat 20:22-23 Bala bo mu iwita: “Nina ani bagunang te yu nasam mu nina karogo te nal i?” Jesus bagunang te balam mu ko nunguning mu nu ikup giokko.}

Se nuna balman, “Ana am ginakko,” maman.

23 Se Jesus nunga maonam, “Nunguningta nina ikup ani aisimon mu nina ago ningarmonkowo! Bare awiriya agiting sengam mu te se agiting ngas mu te dagimonko mu aninga mel mena. Kuwim umutang mu arikaya aninga Ait nunga tuteram umutang la te dagimonko.”

24 Se olekem l0 mu mel mu ko den ikiman ale launuria ilagala mu nogo ko nongomang ninguru ikuwuram. 25 Se Jesus olekem suen la nunga auram se taiman se nunga maonam, “Nina ikisan, ali sor saki ko kariimet nunga supuling mu kariimet ninguru nunga ira kutuwu karogo kapasan, ale nunga ikia te la nunga bitarsan. 26 Bare ninga ningi munan umu me ta anirukko. Mena. Awiriya nu ninga ningi biya bagurukko kueruk, mu nu ura kari yam iwita nenenga saonga bagurukko mu asele. 27 Se awiriya nu gira nup biya bagurukko kueruk, mu nu ninga ura dungan kari iwita bagurukko. 28 Mu awuk, Kari ko Kuriang betela kariimet noko ura dungan betemonko me tairam. Mena. Nu kariimet nunga sangukko tairam. Ale kueruk ale ko gue te kariimet suen biya nunga dia taukko tairam.” ^{▼▼Mat 20:26-28 Jesus kota numi ira kutuwuram: Phil 2:3-8.}

Jesus kari ilagala nomotam sisira mu nunga nungam

(Mark 10:46-52; Luke 18:35-43)

29 Jesus ko olekem arungu Jericho wonong beteman ale namakasan, se kariimet motam biya Jesus kowom karokasan. 30 Se kari ilagala nomotam sisira lage te dagiwaman mu Jesus taiwaram mu ikiman ale aikasan ale balukasan, “Aya, Kari Biya, David ko Kuriang, ni gemang ana nangaruko!” makasan.

31 Se kariimet ining nungarman ale kutek mamonko nunga manorman. Bare nuna am sail karogo nunguningkiri aikasan, “Aya, Kari Biya, David ko Kuriang,” makasan, “ni gemang ana nangaruko!” makasan.

32 Se Jesus sanamaram ale kari ilagala nukung nunga auram ale nunga isuam, “Nina anape mel ani ningimik te bitirikko ya?”

33 Se nuna balman, “Kari Biya, ni anananga namatam nunguru nangaruko,” maman.

34 Se Jesus nogo ko gomang batagam se nomotam ilu tam. Se tom mu te la nomotam sor ari gilingiman ale Jesus kowom karoman.